धौलागिरी टेलिभिजन 
बागलुङ । पत्रकार महासंघ बागलुङ शाखामा तालाबन्दी भएको छ । शुद्धिकरणका नाममा क्रियाशिल पत्रकारलाई बाहिर राखेर पत्रकारिता बाहिरका व्यक्तिहरुलाई सदस्यता प्रदान गरेको भन्दै प्रेस चौतारी नेपाल जिल्ला शाखा बागलुङले र सदस्यता नै नपाएका क्रियाशिल पत्रकारहरुले महासंघमा तालाबन्दी गरेका हुन् ।
प्रेस चौतारी र क्रियाशिल नयाँ पत्रकारहरुले छुट्टाछुट्टै ताला लगाएका हुन् । प्रेस चौतारीले शुद्धिकरणका नाममा गैह्र पत्रकारलाई भित्राएको भन्दै आपत्ति जनाएको छ ।
पत्रकार महासंघले जिल्ला र प्रदेशबाट भएको सिफारिसभन्दा बाहिरबाट सत्ता र शक्तिको आडमा सदस्यता भित्राउने काम भएकाले बाध्य भएर तालाबन्दी गर्नुपरेको जिल्ला अध्यक्ष सिर्जना पन्तले बताउनुभयो । शुद्धिकरण मापदण्डलाई अक्षरशः पालना गरेर सदस्यताको टुंगो लगाउन चौतारीले माग गरेको छ ।
त्यस्तै, जिल्ला शाखाको बैठकले सर्वसम्मत निर्णय गर्दासमेत सदस्यता नदिएको भन्दै नयाँ सदस्यका आकांक्षीहरु आन्दोलनमा उत्रिका हुन् । बिना कारण जिल्ला शाखाले गरेको निर्णय बमोजिम केन्द्रले सदस्यता लिनबाट बञ्चित गराएकाले ताला लगाउन बाध्य भएको पत्रकार बिनोद प्रतिकले बताउनुभयो ।
