धौलागिरी टेलिभिजन 
पर्वत, आगलागी तथा यससँग जोडिएका विपद्जन्य घटनाहरू न्यूनीकरण गर्दै नागरिकलाई सुरक्षित गराउन पर्वत प्रहरीले सदरमुकाम कुश्मा बजारमा ‘डेमो’ प्रदर्शन गरेको छ ।
प्रहरीले समुदायसँग जोडिएर गर्ने विभिन्न कार्यक्रम अन्तर्गत विद्यार्थी तथा आम नागरिकलाई भेला पारेर ‘डेमो’ प्रदर्शन गरिएको हो । जिल्ला प्रहरी कार्यालय पर्वतका सूचना अधिकारी प्रहरी निरीक्षक रामप्रसाद सापकोटाका अनुसार विपद् व्यवस्थापन गुल्म बागलुङको प्राविधिक सहायतामा कार्यक्रम गरिएको हो । घरमा विभिन्न कारणले हुनसक्ने आगलागीका कारण र नियन्त्रणको बारेमा प्रहरीले प्रयोगात्मक रूपमा विधिहरू देखाएका हुन् ।
खाना पकाउने एल.पी ग्याँस सिलिन्डरबाट लिक भएर आगलागी भएपछि नियन्त्रणमा लिने उपाय सिकेपछि सहायक प्रमुख जिल्ला अधिकारी गणेश पौडेलले नै ‘फायर एक्सटीङगुइसर’ को प्रयोगले आगो नियन्त्रणमा लिँदा ‘डेमो’ हेरिरहेका बजारवासी र विद्यार्थीहरूले चाख मानेर हेरे ।
त्यही क्रममा जिल्ला प्रहरी कार्यालय पर्वतका प्रहरी निरीक्षक रामप्रसाद सापकोटाले आगलागीका कारण र नेपालमा यसबाट भइरहेको जनधनको क्षतिका बारेमा सबैलाई सुनाए । विपद् व्यवस्थापन गुल्म बागलुङबाट प्रहरी निरीक्षक रामकृष्ण पाठक नेतृत्वको टोलीले आगोजन्य विपद्बाट हुनसक्ने क्षति र सावधानीका उपायहरू सम्बन्धमा सैद्धान्तिक ज्ञान प्रदान गर्नुका साथै ग्यास सिलिन्डरबाट व्यवहारिक अभ्यास तथा प्रदर्शनी समेत गरेर देखाउँदा कुश्माबासीले आगलागीको कारण र तत्कालै गर्न सकिने कामहरूको बारेमा थाहा पाए ।
विशेषतः भान्सामा ग्याँस लिक हुने र त्यहीँबाट आगलागी सुरु हुने भएकोले प्रहरीले भान्सा कोठामा ग्याँसको प्रयोग गर्दा अपनाउनुपर्ने सावधानीहरूको बारेमा सिकाएको छ । प्रहरीको ‘डेमो’ बाट विद्यार्थी र नागरिकले ग्याँस सिलिन्डर बन्द गर्ने पद्धति, विद्युतीय उपकरण र आगलागी, ग्याँस सिलिन्डर भएको ठाउँमा हुनुपर्ने हावा, आगो नियन्त्रण गर्न आगो निभाउने उपकरण, आगलागीको बेलामा पानी प्रयोग र कहिलेकाहीँ पानीकै प्रयोगबाट बढ्न सक्ने चुनौती, सुरक्षित स्थान, अग्नि नियन्त्रण दल लगायतको बारेमा सिक्ने मौका पाएका छन् ।
‘डेमो’ हेर्न उपस्थित भएकाहरूलाई प्रहरी निरीक्षक सापकोटाले सामान्य अवस्थामा हुन सक्ने आपत्कालीन अवस्थाको बारेमा हामी सबै नागरिक सचेत बन्नुपर्ने बताए । सहायक प्रजिअ पौडेलले साना बालबालिकालाई ग्याँस, लाइटर, सलाई जस्ता आगोजन्य पदार्थबाट टाढा राख्नु अभिभावकको जिम्मेवारीलाई ध्यानमा राखी सुरक्षा सतर्कता अपनाउन अनुरोध गरे ।
