धौलागिरी टेलिभिजन 
बागलुङ । बिहिबार राती परेको भीषण वर्षासंगै बागलुङ नगरपालिका वडा नम्वर ४ कुँडुले हुँदै बग्ने ब्रान्द्रेखोलामा आएको बाढीले बगाउँदा दुई जनाको मृत्यु भएको छ । बाढीमा परी एकजना हराईरहेका छन् ।
बाढीमा परी बानपा ४ कुँडुलेदेखी मालिकातर्फ जाँदै गरेको ध २ प ८०१० नम्बरको मोटरसाइकल र घ १ प ९९९६ नम्बर को स्कुटरमा सवार बान्द्रे अढाईथर बस्ने २३ वर्षिय अर्जुन सापकोटा र २२ वर्षिय अविशेक रेग्मीको मृत्यु भएको जिल्ला प्रहरी कार्यालय बागलुङका डिएसपी विजय यादवले जानकारी दिनुभयो ।
सापकोटा र रेग्मीको शव घटनास्थलबाट झण्डै १ सय मिटर तल फेला परेको यादवले बताउनुभयो । दुई शव पोष्टमार्टमको लागि धौलागिरि अस्पतालमा ल्याईएको छ । यस्तै, बाढीले बगाउँदा सोही स्थानका २० वर्षिय कमल सापकोटा बेपत्ता हुनु भएको छ ।
बेपत्ता सापकोटाको खोजीकार्यमा प्रहरी निरीक्षक प्रताप पौडेल नेतृत्वको प्रहरी टोली घटनास्थलमा परिचालित भएको थियो । बान्द्रेखोलामा आएको बाढीले मान्छे बगाएको खबर गरेलगत्तै प्रहरी घटनास्थलमा पुगेको थियो । बाढीले बगाएको स्कुटर सडक छेउमा फेला परेको छ भने मोटरसाइकलको खोजी भईरहेको प्रहरीले जनाएको छ ।
