images
images

रत्नेचौरमा सूर्यमुखीको व्यावसायिक खेती

बागलुङ । म्याग्दीको बेनी नगरपालिका–१, रत्नेचौरका सुुरत बोगटीले गतवर्ष सूर्यमुखीको बीय बेचेर २० हजार आम्दानी गरे। रत्नेचौरमा पहिलोपटक व्यावसायिक रुपमा सूर्यमुखी खेती गदैं आएका बोगटीले घरायसी र आफन्तलाई समेत कोशेलीको रूपमा सुर्यमुखी तेलकै प्रयोग गर्छन् ।

भारतबाट बीउ ल्याएर सूर्यमुखी खेती गरेका बोगटीले छोरीको विवाहमा रोटी र अन्य परिकार बनाउन चाहिने तेल किन्न समेत बजारमा जानुपरेन । बोगटीजस्तै रत्नेचौरकै बालकुमार कार्कीले यसबर्ष १ रोपनी क्षेत्रफलमा सूर्यमुखी लगाएका छन् ।

तेलको बजार अनुसार आगामी बर्ष थप ५ रोपनीमा खेती विस्तार गर्ने योजनामा रहेका कार्कीको बारी अहिले आन्तरिक पर्यटकको लागि आकर्षण बनेको छ । तेलन बालीअन्तर्गत अहिले रत्नेचौरमा परीक्षणका रुपमा सूर्यमुखी लगाउने कृषकको संख्या ह्वात्तै बढेको छ । सूर्यमुखी खेतीले वर्षभरि तेल खान, बीउ राख्न र बीउ किन्न आउने किसानलाई बिक्री गर्ने गरिएको छ ।

तोरीबारीका कारण भाइरल रत्नेचौरमा सूर्यमुखी खेतीका कारण अहिले चर्चामा छ ।सूर्यमुखीको तेल स्थानीयले गाउँकै मिलबाट प्रशोधन गरी प्रयोग गर्ने र बिक्री समेत गर्ने गरेका छन्।

रत्नेचौरको सूर्यमुखी र तोरीबारीको सिजनले आन्तरिक पर्यटकलाई समेत आर्कषित गरेको स्थानीय यूवा सन्तोष रावलको भनाई छ । स्वास्थ्यको दृष्टिले पनि सूर्यमुखीको तेल पातलो र कोलस्ट्रोलरहित हुन्छ ।सूर्यमुखीको तेल उच्च रक्तचाप, मुटुरोगीलाई लाभदायक हुन्छ ।

पछिल्लो समय सूर्यमुखीको फूल फुल्न थालेसँगै टिकटक बनाउने, फोटो खिच्ने र घुम्न आउनेको भिड लाग्ने गरेको छ ।